“Surxon” — “Andijon”. Termizdagi uchrashuvda ommaviy mushtlashuv bo‘ldi va hakam 8 ta qizil ko‘rsatdi

Futbol bo‘yicha O‘zbekiston Birinchiligining 13-turidan joy olgan “Surxon” — “Andijon” o‘yini ommaviy mushtlashuv bilan tugadi.

Termiz shahrida bo‘lib o‘tgan o‘yinda 2:2 hisobi qayd etildi. Andijonliklar mag‘lubiyatdan 90-daqiqaga kelib qutulib qoldi.

Qo‘shimcha daqiqalarda esa har ikki jamoa futbolchilari ommaviy mushtlashuvda ishtirok etdi. Oqibatda bosh hakam Igor Xudoydatov har ikki klubning 4 nafardan futbolchisini maydondan chetlatdi.

Futbol qoidalariga ko‘ra, biror jamoaning to‘rt futbolchisiga qizil kartochka ko‘rsatilsa, uchrashuv shu onning o‘zidayoq yakuniga yetadi. Termizdagi uchrashuv ham aynan shunday ruhda tugatildi.

Bosh hakamning mazkur uchrashuv hamda so‘nggi daqiqadagi holatlar bo‘yicha protokoli PFLga yetib kelganidan so‘ng, vaziyatga to‘liq oydinlik kiritish mumkin bo‘ladi. Reglamentga ko‘ra, O‘zbekiston Birinchi ligasining har bir klubi uchrashuv yakunida o‘yin videosi tushirilgan disklarni PFLga taqdim etishi shart.

Ma’lumot uchun, “Surxon” klubi katta tanaffusdan so‘ng shu yil Birinchi ligaga qaytgan bo‘lsa, “Andijon” o‘tgan yilgi mavsum yakunlariga ko‘ra Oliy ligadan tushib ketgandi.

O‘zbekiston Birinchi ligasi 13-tur bellashuvi 4-iyun, yakshanba

“Surxon” — “Andijon” 2:2

Chetlatishlar: Temur Mamadaliyev, 90+4 (S). Najmiddin Normurodov, 90+4 (S). Sanjar Shomurodov, 90+4 (S). Akmal Abdurahmonov, 90+4. Ibrohim Otaxonov, 90+4 (A). Akbar Xo‘jayev, 90+4 (A). Sanjar Asqaraliyev, 90+4 (A). Farhod Bekmurotov, 90+4 (A).

Uchrashuv protokoli PFL saytidan, tarkiblar “Championat.asia” saytidan olindi.