«Сурхон» — «Андижон». Термиздаги учрашувда оммавий муштлашув бўлди ва ҳакам 8 та қизил кўрсатди

Футбол бўйича Ўзбекистон Биринчилигининг 13-туридан жой олган «Сурхон» — «Андижон» ўйини оммавий муштлашув билан тугади.

Термиз шаҳрида бўлиб ўтган ўйинда 2:2 ҳисоби қайд этилди. Андижонликлар мағлубиятдан 90-дақиқага келиб қутулиб қолди.

Қўшимча дақиқаларда эса ҳар икки жамоа футболчилари оммавий муштлашувда иштирок этди. Оқибатда бош ҳакам Игорь Худойдатов ҳар икки клубнинг 4 нафардан футболчисини майдондан четлатди.

Футбол қоидаларига кўра, бирор жамоанинг тўрт футболчисига қизил карточка кўрсатилса, учрашув шу оннинг ўзидаёқ якунига етади. Термиздаги учрашув ҳам айнан шундай руҳда тугатилди.

Бош ҳакамнинг мазкур учрашув ҳамда сўнгги дақиқадаги ҳолатлар бўйича протоколи ПФЛга етиб келганидан сўнг, вазиятга тўлиқ ойдинлик киритиш мумкин бўлади. Регламентга кўра, Ўзбекистон Биринчи лигасининг ҳар бир клуби учрашув якунида ўйин видеоси туширилган дискларни ПФЛга тақдим этиши шарт.

Маълумот учун, «Сурхон» клуби катта танаффусдан сўнг шу йил Биринчи лигага қайтган бўлса, «Андижон» ўтган йилги мавсум якунларига кўра Олий лигадан тушиб кетганди.

Ўзбекистон Биринчи лигаси 13-тур беллашуви 4 июнь, якшанба

«Сурхон» — «Андижон» 2:2

Четлатишлар: Темур Мамадалиев, 90+4 (С). Нажмиддин Нормуродов, 90+4 (С). Санжар Шомуродов, 90+4 (С). Акмал Абдураҳмонов, 90+4. Иброҳим Отахонов, 90+4 (А). Акбар Хўжаев, 90+4 (А). Санжар Асқаралиев, 90+4 (А). Фарҳод Бекмуротов, 90+4 (А).

Учрашув протоколи ПФЛ сайтидан, таркиблар «Championat.asia» сайтидан олинди.