Мустақиллик йилларида юқори ривожланиш кўрсаткичларини намоён этган Ўзбекистон енгил саноати 2016 йилга келиб маҳаллий хом ашёнинг 53 фоизини қайта ишлашга муваффақ бўлди ва экспорт қилинган маҳсулот қиймати 1,2 млрд долларни ташкил қилди. Ишлаб чиқарилаётган маҳсулотлар дунёнинг 60 дан ортиқ давлатига экспорт қилинмоқда. «Ўзбекенгилсаноат» АЖ бошқаруви раисининг маслаҳатчиси Расул Содиқов Халқаро пресс-клубнинг 24 майда бўлиб ўтган сессиясида ана шундай маълумотларни келтириб ўтди.
Шунингдек, пресс-клуб йиғилишида мамлакат енгил саноат, мода ва дизайн соҳасининг етакчи вакиллари иштирок этди. Жумладан, «Осиё рамзи» Ўзбекистон дизайнерлар уюшмаси раиси, Тошкент тўқимачилик ва енгил саноат институти проректори Ҳамида Комилова, «Истиқлол» дизайн маркази директори ўринбосари Муродбек Қурбонов.
Пресс-клуб меҳмонлари енгил саноат, мода ва дизайн соҳасида эришилган ютуқлар ва истиқболдаги режалар ҳақида журналистлар билан ўртоқлашди.
«Бугунги ўзбек модасининг халқаро танлов ва намойишларда алоҳида эътирофга сазовор бўлаётгани Ўзбекистонда бу соҳанинг ривожланаётганидан далолат беради. Ҳозирги кунда бир нечта дизайнерлар ўзининг shoоw-rооm’ига, ўзининг брендига, ўз йўналишига эга», — дея ўзбек мода саноатининг ютуқлари ҳақида гапирди «Осиё рамзи» Ўзбекистон дизайнерлар уюшмаси раиси Ҳамида Комилова.
Яқин вақт ичида Франция дизайн академияси билан ҳамкорлик ўрнатишни режалаштираётган «Истиқлол» дизайн маркази директорининг ўринбосари Муродбек Қурбоновнинг таъкидлашича, марказнинг янги моделлар яратиш бўйича лабораторияси мутахассислари Германия, Франция ва Италияда малака ошириб келган. Тадбиркорнинг сўзларига кўра, яратилган солиқ ва божхона имтиёзлари маҳсулотлар сифатини яхшилаш ва рақобатбардошлиги оширишга, шу тариқа экспортбоп маҳсулотлар ишлаб чиқаришга имкон бермоқда. Марказ вакили Франция дизайн академияси билан ўрнатиладиган ҳамкорлик алоқалари Европа бозорига чиқиш учун имконият яратишига умид билдирмоқда.
Изоҳ (0)