O‘zbekiston Vazirlar Mahkamasi huzurida millatlararo munosabatlar va xorijiy mamlakatlar bilan do‘stona munosabatlar bo‘yicha qo‘mita tuzildi. Yangi idora Shavkat Mirziyoyev farmoniga ko‘ra Respublika baynalmilal markazi hamda do‘stlik jamiyatlari va xorijiy davlatlar bilan madaniy-ma’rifiy aloqalar kengashi negizida tashkil etildi, deb xabar beradi “Gazeta.uz”.
“Axborot” teledasturida xabar qilinishicha, davlat rahbarining “Millatlararo munosabatlar va xorijiy davlatlar bilan do‘stona aloqalarni yanada takomillashtirish chora-tadbirlari to‘g‘risida”gi farmoni jamiyatda barqarorlik, tinchlik va birdamlikni ta’minlashga, fuqarolarda yagona ko‘p millatli oilaga mansublik his-tuyg‘ularini mustahkamlash, milliy madaniy markazlar va do‘stlik jamiyatlari faoliyatini rivojlantirish, xorijiy mamlakatlar bilan madaniy-ma’rifiy aloqalarni kengaytirishga qaratilgan.
Qo‘mita jamiyatda millatlararo totuvlik va tolerantlikni ta’minlash borasidagi davlat siyosatini amalga oshirish bo‘yicha vazifalarni bajarish, tinchliksevar siyosatni, mamlakat hayotining barcha sohalarida erishilgan yutuqlarni keng jamoatchilikka tushuntirib borish, jahon hamjamiyati, shuningdek, chet eldagi vatandoshlar diasporalari bilan do‘stlikni mustahkamlash singari vazifalarni bajarishi ko‘zda tutilgan.
Bugungi kunda O‘zbekistonda 130 dan ortiq millat va elat istiqomat qiladi. Mamlakatda 138 milliy madaniy markaz va 34 do‘stlik jamiyatlari faoliyat yuritmoqda.
Izoh (0)