Ўзбекистон Вазирлар Маҳкамаси ҳузурида миллатлараро муносабатлар ва хорижий мамлакатлар билан дўстона муносабатлар бўйича қўмита тузилди. Янги идора Шавкат Мирзиёев фармонига кўра Республика байналмилал маркази ҳамда дўстлик жамиятлари ва хорижий давлатлар билан маданий-маърифий алоқалар кенгаши негизида ташкил этилди, деб хабар беради «Газета.uz».
«Ахборот» теледастурида хабар қилинишича, давлат раҳбарининг «Миллатлараро муносабатлар ва хорижий давлатлар билан дўстона алоқаларни янада такомиллаштириш чора-тадбирлари тўғрисида»ги фармони жамиятда барқарорлик, тинчлик ва бирдамликни таъминлашга, фуқароларда ягона кўп миллатли оилага мансублик ҳис-туйғуларини мустаҳкамлаш, миллий маданий марказлар ва дўстлик жамиятлари фаолиятини ривожлантириш, хорижий мамлакатлар билан маданий-маърифий алоқаларни кенгайтиришга қаратилган.
Қўмита жамиятда миллатлараро тотувлик ва толерантликни таъминлаш борасидаги давлат сиёсатини амалга ошириш бўйича вазифаларни бажариш, тинчликсевар сиёсатни, мамлакат ҳаётининг барча соҳаларида эришилган ютуқларни кенг жамоатчиликка тушунтириб бориш, жаҳон ҳамжамияти, шунингдек, чет элдаги ватандошлар диаспоралари билан дўстликни мустаҳкамлаш сингари вазифаларни бажариши кўзда тутилган.
Бугунги кунда Ўзбекистонда 130 дан ортиқ миллат ва элат истиқомат қилади. Мамлакатда 138 миллий маданий марказ ва 34 дўстлик жамиятлари фаолият юритмоқда.
Изоҳ (0)