O‘zbekiston Respublikasi Prezidentining Kosonsoy tumanidagi Xalq qabulxonasiga shu kungacha 470 dan ortiq murojaat kelib tushdi. Bu haqda “Daryo” muxbiri xabar bermoqda.
Qabulxona mudiri Tohiraxon Mo‘ydinovaga ko‘ra, murojaatlarni asosan uy-joy qurish uchun yer ajratish, ish bilan ta’minlash, kommunal sohadagi muammolar, ish haqi, moddiy yordam va aliment olishga doir masalalar tashkil etmoqda.
— Fuqarolarimizning ba’zan oylab, yillab hal etilmagan muammolariga yechim topishga harakat qilyapmiz, — deydi T. Mo‘ydinova. — Masalan, Ququmboy qishlog‘idagi Navbahor mahallasida yashovchi Zokirjon Ortiqov 2016-yildan beri xususiy bog‘i o‘rtasidan o‘tgan yuqori kuchlanishli elektr tarmog‘ini boshqa joyga ko‘chirishni so‘rab, turli mutasaddi idoralarga murojaat qilgan, biroq masala hal etilmagan. Xalq qabulxonasiga murojaatdan so‘ng uning talabi qondirildi.
Mamayunus Saidov va Tursunboy To‘layev tumandagi “Kushon Global” MChJdan biri bir yildan beri 5 million, yana biri olti oydan beri 6 million so‘m ish haqini ololmayotganidan shikoyat qilgandi. Qisqa muddatda ularning maoshi to‘liq undirib berildi.
Izoh (0)