Ўзбекистон Республикаси Президентининг Косонсой туманидаги Халқ қабулхонасига шу кунгача 470 дан ортиқ мурожаат келиб тушди. Бу ҳақда «Дарё» мухбири хабар бермоқда.
Қабулхона мудири Тоҳирахон Мўйдиновага кўра, мурожаатларни асосан уй-жой қуриш учун ер ажратиш, иш билан таъминлаш, коммунал соҳадаги муаммолар, иш ҳақи, моддий ёрдам ва алимент олишга доир масалалар ташкил этмоқда.
— Фуқароларимизнинг баъзан ойлаб, йиллаб ҳал этилмаган муаммоларига ечим топишга ҳаракат қиляпмиз, — дейди Т. Мўйдинова. — Масалан, Қуқумбой қишлоғидаги Навбаҳор маҳалласида яшовчи Зокиржон Ортиқов 2016 йилдан бери хусусий боғи ўртасидан ўтган юқори кучланишли электр тармоғини бошқа жойга кўчиришни сўраб, турли мутасадди идораларга мурожаат қилган, бироқ масала ҳал этилмаган. Халқ қабулхонасига мурожаатдан сўнг унинг талаби қондирилди.
Мамаюнус Саидов ва Турсунбой Тўлаев тумандаги «Кушон Глобал» МЧЖдан бири бир йилдан бери 5 миллион, яна бири олти ойдан бери 6 миллион сўм иш ҳақини ололмаётганидан шикоят қилганди. Қисқа муддатда уларнинг маоши тўлиқ ундириб берилди.
Изоҳ (0)