“Birinchi kanal”dagi “Modniy prigovor” ko‘rsatuvida o‘zbek milliy liboslarini ko‘z-ko‘z qilishdi

Rossiyaning “Birinchi kanali”dagi “Modniy prigovor” (“Moda sudi hukmi”) ko‘rsatuvida “Moda maslahatlari” ruknida o‘zbek milliy liboslari haqida so‘z bordi.

Ko‘rsatuv boshlovchisi, moda tarixchisi Aleksandr Vasilyev yaqinda o‘z sayyor maktabi bilan O‘zbekistonda bo‘lib, ajoyib taassurotlar bilan qaytganini aytdi. “Mamlakat toza, o‘ziga xos an’analarga boy, taomlari mazali. Men tashrif buyurishga muvaffaq bo‘lgan shaharlar meni moda sohasidagi kashfiyotlar bilan xursand qildi”, — deya boshlovchi bir qator milliy o‘zbek liboslarini namoyish qildi va ularga ta’riflar berdi.

Aleksandr Vasilyev O‘zbekistonda milliy kiyimlarni hozirgacha ham kiyib yurishlarini, bunga esa mamlakatning qadimiy tarixga ega ekanligi sababchiligini ta’kidladi. U O‘zbekistondan olib kelgan tayyor liboslar bilan birga, atlas, adras va shoyi matolarni ham ko‘rsatdi, ularning qo‘lda qanday usullar bilan to‘qilishini qisqacha tushuntirib berdi.

“Men dunyoning 70 dan ortiq mamlakatida bo‘lganman. Shunday ekan tasavvur qilavering. O‘zbekistonda kiyim xarid qilish Marokashdagidan ham yaxshiroq. Agar menga tanlash imkoniyatini berishganida, albatta O‘zbekistonni tanlagan bo‘lar edim. Chunki o‘ziga xos me’morchilik, an’analar, qo‘l mehnati, mazali taomlar uyg‘unligi va men u yerda duch kelgan matolarning go‘zalligi — juda ajoyib”, — deya moda tarixchisi o‘z taassurotlari bilan bo‘lishdi.