Россиянинг «Биринчи канали»даги «Модний приговор» («Мода суди ҳукми») кўрсатувида «Мода маслаҳатлари» рукнида ўзбек миллий либослари ҳақида сўз борди.
Кўрсатув бошловчиси, мода тарихчиси Александр Васильев яқинда ўз сайёр мактаби билан Ўзбекистонда бўлиб, ажойиб таассуротлар билан қайтганини айтди. «Мамлакат тоза, ўзига хос анъаналарга бой, таомлари мазали. Мен ташриф буюришга муваффақ бўлган шаҳарлар мени мода соҳасидаги кашфиётлар билан хурсанд қилди», — дея бошловчи бир қатор миллий ўзбек либосларини намойиш қилди ва уларга таърифлар берди.
Александр Васильев Ўзбекистонда миллий кийимларни ҳозиргача ҳам кийиб юришларини, бунга эса мамлакатнинг қадимий тарихга эга эканлиги сабабчилигини таъкидлади. У Ўзбекистондан олиб келган тайёр либослар билан бирга, атлас, адрас ва шойи матоларни ҳам кўрсатди, уларнинг қўлда қандай усуллар билан тўқилишини қисқача тушунтириб берди.
«Мен дунёнинг 70 дан ортиқ мамлакатида бўлганман. Шундай экан тасаввур қилаверинг. Ўзбекистонда кийим харид қилиш Марокашдагидан ҳам яхшироқ. Агар менга танлаш имкониятини беришганида, албатта Ўзбекистонни танлаган бўлар эдим. Чунки ўзига хос меъморчилик, анъаналар, қўл меҳнати, мазали таомлар уйғунлиги ва мен у ерда дуч келган матоларнинг гўзаллиги — жуда ажойиб», — дея мода тарихчиси ўз таассуротлари билан бўлишди.
Изоҳ (0)