Xalqaro futbol uyushmasi FIFA shu yilning 9-may kuni Bahrayn poytaxti Manama shahrida yillik kengashini o‘tkazadi. Bu haqda tashkilot matbuot xizmati xabar berdi.
Kengash kun tartibidan o‘rin olgan asosiy masala 2026-yil bo‘lib o‘tadigan Jahon Chempionatida kontinentlar uchun kvotalar ajratishdan iborat. Avvalroq FIFA 2026-yilgi Jahon chempionatida ishtirokchilari soni 48 taga yetishini rasman ma’lum qilib ulgurgandi.
Rejaga ko‘ra, FIFA Yevropa qit’asi uchun 16 ta yo‘llanmani ravo ko‘radi. Bu borada Afrika terma jamoalarining mundialdagi ulushi 9 ta, Osiyoniki esa 8 ta bo‘lishi ko‘zda tutilgan. Okeaniya uchun 1 ta kvota yetarli deb hisoblangan. Amerika qit’asining ikki materigi mos ravishda 6 tadan yo‘llanmani qo‘lga kiritadi.
Shuningdek, mezbon jamoa alohida 1 ta o‘ringa ega bo‘ladi. Bunda bir jihatga e’tibor qaratish kerak, mezbon jamoa hisobiga u joy olgan konfederatsiya 1 ta kvotasini yo‘qotadi. Qolgan ikki kvotani esa FIFA qit’alararo pley-off orqali taqsimlaydi.
Shundan kelib chiqilsa, Osiyo qit’asi 8 ta alohida va 1 ta qo‘shimcha yo‘llanma egasiga aylanishi mumkin. Bunda qit’aning sakkiz terma jamoasi to‘g‘ridan-to‘g‘ri chiptani qo‘lga kiritishi, yana 1 tasi esa pley-offda ishtirok etishi mumkin bo‘ladi.
Aytib o‘tilgani kabi, yakuniy qaror 9-may kuni e’lon qilinadi.
Izoh (0)