Tennis bo‘yicha Avstraliya ochiq chempionatining erkaklar o‘rtasidagi yakkalik turniri ham o‘z nihoyasiga yetdi. Avvalroq ayollar o‘rtasidagi hal qiluvchi o‘yinda opa-singil Uilyamslar kortga tushgan bo‘lib, singil Serena ikki set natijasiga ko‘ra opasidan ustun kelgandi.
Dunyo tennis reytingida 17-o‘rinda borayotgan Rojer Federar erkaklar o‘rtasidagi musobaqaning finalida to‘qqizinchi raketka bo‘lib turgan ispaniyalik Rafael Nadalga qarshi kurash olib bordi va g‘olib chiqdi — 6:3, 3:6, 6:1, 3:6, 6:3.
Federar uchun bu Avstraliya ochiq chempionatidagi beshinchi g‘alaba bo‘ldi. Raketka ustasining “Katta dubulg‘a” turkumidagi turnirlardagi chempionligi endi 18 tani tashkil qiladi.
Rojer so‘nggi bor Uimbildon—2012 da g‘olib chiqqan bo‘lib, shundan keyin “Katta dubulg‘a” g‘olibligini qo‘lga kirita olmagandi. 2017-yilning birinchi oyi esa shveysariyalik uchun omadli keldi.
Ma’lumot uchun, Federer Nadalni “Katta dubulg‘a” finallarida so‘nggi bor 10 yil muqaddam — Uimbildon—2007 da mag‘lub etgan bo‘lib, oradan 10 yil o‘tib u bunga yana bir bor muvaffaq bo‘ldi.
Izoh (0)