Samsung Electronics kompaniyasining 2016-yil yakunlari bo‘yicha savdodan olgan foydasi 10,7 foizga o‘sib, 29,2 trillion von (25 milliard dollar)ni tashkil qildi. Yillik daromad 0,6 foizga oshib, 201,9 trillion von (172,9 milliard dollar)ga yetdi. Bu haqda kompaniya hisobotiga tayanib, “Vc.ru” xabar berdi.
Samsung 2016-yilning to‘rtinchi choragini 9,2 trillion von (7,89 milliard dollar) foyda bilan yakunladi. Bu 2015-yilning shu davriga nisbatan 50 foizga ko‘proq. Bu kompaniyaning savdodan tushgan foyda bo‘yicha oxirgi uch yildagi eng yaxshi natijasi.
2016-yil to‘rtinchi chorakdagi kompaniyaning daromadi 1 foizga oshib, 53,3 trillion von (45,7 milliard dollar)ni tashkil qildi.
Foydaning o‘sishi xotira chiplari va displeylar savdosining oshishi bilan bog‘liq. Ularning hissasi umumiy qiymatda savdodan tushgan foydaning 68 foizini tashkil qildi. Shuningdek, Galaxy S7 va S7 Edge smartfonlarining savdosidan tushgan foyda ham bu o‘sishda muhim o‘rin egallagan.
Galaxy Note 7 smartfonlari savdosining bekor qilinishi va ularning sotuvdan qaytarib olinishi kompaniya ko‘rsatkichlariga jiddiy ta’sir ko‘rsatmadi, deb ta’kidlab o‘tgan Samsung rasmiylari. Avvalroq kompaniya smartfonlarning yonib ketishi bilan bog‘liq mojarolar to‘rtinchi chorakda savdodan tushgan foydaning 1,8 milliard dollargacha tushishini kutgandi.
Samsung 2016-yil avgust oyida Galaxy Note 7 ni savdoga chiqardi, biroq kompaniya kuzda telefonlarning ishlashi yoki quvvat olishi vaqtida yonib ketishi bilan bog‘liq ko‘p sonli hodisalar tufayli smartfonlar savdosini va ishlab chiqarishni to‘xtatdi. Mojarolar sababli 2016-yil uchinchi chorakda savdodan tushgan foyda 30 foizga pasayib, 4,6 milliard dollarni tashkil qildi, kompaniya esa 7,02 milliard dollar foyda olishni ko‘zlagandi.
Mavzuga doir: Samsung kompaniyasi Note brendi ostidagi smartfonlarni ishlab chiqarishni davom ettirishga qaror qildi
Izoh (0)