YouTube ma’muriyati sabablarini tushuntirib bermagan holda, Shimoliy Koreyaning yangiliklar va ko‘ngilochar kanallaridan yozib olingan lavhalarni e’lon qilgan ikkita akkauntni bloklab qo‘ydi, deb yozadi TJournal. Akkauntlardan biriga besh mingdan ortiq kishi obuna bo‘lgan, ikkinchisiga esa yopiq mamlakat hayoti haqida 350 ga yaqin rolik joylangan edi.
17-yanvar kuni YouTube ma’muriyati ogohlantirmasdan turib, Yaponiya fuqarosi Emil Truskovskiyning Shimoliy Koreya bo‘ylab sayohat mavzusidagi roliklardan iborat akkauntini yopib qo‘ydi. Bir necha soatdan keyin foydalanuvchiga uning akkauntini qayta tiklab bo‘lmaydigan qilib o‘chirib tashlashgani haqida bildirishnoma keldi.
Shu kuniyoq ogohlantirishsiz vyetnamlik millatchi Vu Nam Fiongning Shimoliy Koreya telekanallaridan translyatsiya yozuvlari e’lon qilingan kanali bloklab qo‘yildi. Akkauntning o‘chirilishini ma’muriyat roliklar YouTube tematikasiga mos emasligi bilan izohladi.
Fiongning o‘zi roliklar AQSh hukumati tomonidan Shimoliy Koreyaga nisbatan kiritilgan sanksiyalar tufayli o‘chirilganini taxmin qildi.
Bunda gap 2016-yil martida joriy qilingan va AQSh hududidagi har qanday odam yoki kompaniyaga Shimoliy Koreyaning G‘aznachilik, targ‘ibot va tashviqot departamenti bilan ish olib borishini taqiqlaydigan sanksiyalar haqida bormoqda, ushbu departament, xususan, televideniye uchun ham javob beradi.
Izoh (0)