Tokioning Big Sight majmuasidagi qimmatbaho ashyolar xalqaro ko‘rgazmasida Xitoyning zargarlik buyumlarini o‘g‘irlashga ixtisoslashgan “Pushti panda” jinoiy guruhi 3 a’zosi qo‘lga olindi. Bu haqda “TASS” xabar bermoqda.
Yaponiya politsiyasi jinoyatchilarni hibsga olishni bir yil davomida tayyorladi. Qo‘lga olingan uchlik o‘tgan yili ham mazkur ko‘rgazmada “faoliyat” olib borgan. Jumladan, videokameralar ular qiymati 25 ming dollar bo‘lgan brilliant uzukni o‘g‘irlaganini qayd etgan. Biroq o‘shanda o‘g‘rilarni tutishning imkoni bo‘lmagan, ular jinoyat amalga oshirilgan kunning o‘zida zudlik bilan Yaponiyani tark etgandi.
“Pushti panda” guruhi deyarli butun dunyo bo‘ylab harakat qiladi. Ularning a’zolari xaridor qiyofasida zargarlik ko‘rgazmalari va do‘konlariga tashrif buyuradi. Uzoq muddatga cho‘ziladigan muzokaralar bilan sotuvchilarni chalg‘itib, haqiqiy qimmatbaho buyumlarni qalbakisi bilan almashtiradi.
Tokioda 2015-yili ham mazkur guruhga mansubligi taxmin qilingan ikki shaxs 170 ming dollar turadigan brilliant uzukni o‘g‘irlashda gumon qilinib, qo‘lga olingandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)