Токиода Хитойнинг «Пушти панда» жиноий гуруҳи аъзолари қўлга олинди
Токионинг Big Sight мажмуасидаги қимматбаҳо ашёлар халқаро кўргазмасида Хитойнинг заргарлик буюмларини ўғирлашга ихтисослашган «Пушти панда» жиноий гуруҳи 3 аъзоси қўлга олинди. Бу ҳақда «ТАСС» хабар бермоқда.
Япония полицияси жиноятчиларни ҳибсга олишни бир йил давомида тайёрлади. Қўлга олинган учлик ўтган йили ҳам мазкур кўргазмада «фаолият» олиб борган. Жумладан, видеокамералар улар қиймати 25 минг доллар бўлган бриллиант узукни ўғирлаганини қайд этган. Бироқ ўшанда ўғриларни тутишнинг имкони бўлмаган, улар жиноят амалга оширилган куннинг ўзида зудлик билан Японияни тарк этганди.
«Пушти панда» гуруҳи деярли бутун дунё бўйлаб ҳаракат қилади. Уларнинг аъзолари харидор қиёфасида заргарлик кўргазмалари ва дўконларига ташриф буюради. Узоқ муддатга чўзиладиган музокаралар билан сотувчиларни чалғитиб, ҳақиқий қимматбаҳо буюмларни қалбакиси билан алмаштиради.
Токиода 2015 йили ҳам мазкур гуруҳга мансублиги тахмин қилинган икки шахс 170 минг доллар турадиган бриллиант узукни ўғирлашда гумон қилиниб, қўлга олинганди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
