Hindiston hukumati Nepaldagi zilzila sababli Everest balandligini o‘lchab ko‘rishga qaror qildi

Hindiston hukumati Everest (Jomolungma) cho‘qqisi balandligini o‘lchab ko‘rishga qaror qildi, deb xabar beradi “Korrespondent.net”.

Bunga olimlarning Nepalda 2015-yilda sodir bo‘lgan va 8 mingdan ortiq kishini hayotdan olib ketgan 7,8 magnitudali zilzila tufayli cho‘qqi balandligi pasaygan bo‘lishi mumkinligi haqidagi taxmini sabab bo‘ldi. Ular sun’iy yo‘ldoshdan olingan tasvirlarga tayanib, Everest balandligi bir necha santimetrga kamayganini bildirdi.

Hukumat komissiyasi raisi Svarna Subba Rao ekspeditsiya ikki oydan so‘ng jo‘natilishini ma’lum qildi. O‘lchov ishlari bir oyga yaqin vaqt olishi, hisob-kitoblar uchun esa ikki hafta ketishi aytildi. 

Ma’lumot uchun, 1955-yilda o‘tkazilgan o‘lchovlarga ko‘ra, Everest balandligi 8848 metrni tashkil etadi va u dunyodagi eng baland cho‘qqi hisoblanadi. 

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.