“Oltin malina” mukofoti tashkilotchilari mukofotning 2017-yilgi nominantlari nomini e’lon qildi. Nominatsiyalar soni bo‘yicha (9 ta nominatsiya) rejissor Ben Stillerning “ Namunali erkak 2” filmi yetakchilikni qo‘lga olgan. Bu haqda The Hollywood Reporter’ga asoslanib, “Afisha Daily” xabar berdi.
Zak Snayderning “Betmen Supermenga qarshi: Adolat tongida” filmi sakkizta nominatsiya, shu jumladan, “Eng yomon film” va “Eng yomon aktyor” yo‘nalishlarida nomzod sifatida ko‘rsatildi. “Oltin malina”ning asosiy mukofotiga shuningdek, “Yengil tabiatli bobo”, “Misr xudolari” va “Mustaqillik kuni: Qayta tug‘ilish” filmlari ham da’vogarlik qilmoqda.
2016-yilda “Oltin malina”ning asosiy mukofoti birdaniga ikkita film – “Kulrangning ellik xil jilosi” va “Fantastik to‘rtlik” filmlariga berilgan edi.
2017-yilda “Oltin malina” 37-marta o‘tkaziladi. Kinomatografiyadagi eng yomon natijalar uchun beriladigan ushbu mukofot 1980-yilda Jon Uilson tomonidan tashkil qilingan.
“Razzi” (“Oltin malina”ning ikkinchi nomi) mukofoti sohiblari 25-fevralda, “Oskar” mukofotini topshirish marosimidan bir kun oldin е’lon qilinadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)