Tailand gazetasi marhum qirolga bag‘ishlab, suratlari “jonlanuvchi” gazeta sonini chiqardi

Tailandning Thairath gazetasi marhum qirol Pumipon Adulyadetga bag‘ishlab, har bir sahifasida to‘ldirilgan reallik texnologiyasi qo‘llanilgan gazeta sonini chiqardi, deb yozadi TJournal.

32 betli gazeta soni uch million nusxada chiqarilgan. U mamlakatni 1946-yildan buyon boshqarib kelgan marhum qirol Pumipon Adulyadetga bag‘ishlangan.

Gazeta tahririyati maxsus sonni uch oy davomida Tailanddagi uchta IT-kompaniya bilan hamkorlikda tayyorladi. Rasm va fotosuratlar Thairath AP bepul dasturi yordamida “jonlanadi”.

Masalan, qirol saksofon chalayotgani aks etgan fotosurat yonida musiqiy asbobning 3D-nusxasi paydo bo‘ladi, shuningdek, marhum monarx chalgan kuy tovushlari eshitiladi.

Tailand qiroli Pumipon Adulyadet 2016-yil 13-oktabr kuni sog‘lig‘i keskin yomonlashgani tufayli vafot etdi. 29-noyabr kuni esa valiahd shahzoda Maxa Vachiralongkorn rasman qirollik taxtiga o‘tirdi.