“Lokomotiv”
Asosiy tarkibning 5 nafar futbolchisi: Artur Gevorkyan, Nemanya Yanichich, Server Jeparov, Temurxo‘ja Abduxoliqov va Sanjar Shoahmedov bilan xayrlashgan “Lokomotiv” avstraliyalik futbolchini o‘z safiga qo‘shib olishi mumkinligi xabar qilingandi. “Championat.asia” nashri uning kimligiga oydinlik kiritdi.
Srechko Mitrovich. Kelib chiqishi serbiyalik bo‘lgan, keyinroq Avstraliya fuqaroligini olgan yarim himoyachi. O‘zining navqiron onlarini o‘tab bo‘lgan — fevralda 32 yoshga qadam qo‘yadi. Faoliyatini 2003-yil Italiyaning “Askoli” klubida boshlagan. So‘nggi jamoasi esa Malayziyaning “Sabah” klubi.
“Lokomotiv” bosh murabbiyi Mirko Yelichich ham uning kabi Serbiyada tug‘ilgan va Avstraliya fuqaroligini qo‘lga kiritgan. Uning “temiryo‘lchilar” safiga kelishi shunchaki tasodif emas.
“Bunyodkor”
Sergey Lushchan murabbiyligidagi “Bunyodkor” Saudiya chempionatining 1-davrasidan keyin 8-o‘rinda borayotgan jamoani mag‘lub eta olmadi — 1:1. Hafta boshida mazkur klubni tark etgan uch futbolchi — Dilshod Jo‘rayev, Alibobo Rahmatullayev va Zabihullo O‘rinboyev 1 tadan gol urib, “Olmaliq”ning Qozog‘iston klubi ustidan yirik g‘alabasini ta’minlab bergandi.“Bunyodkor” — “Ar-Raid” (Saudiya Arabistoni) 1:1
Gollar: Ismoil, 33 (0:1). Eldor Shomurodov, 60 (1:1).
“Nasaf”
Yevropaning 5 ta klubini birin-ketin mag‘lub etgan “Nasaf”ga qoyil qolmay iloj yo‘q. Raqiblar juda kuchli bo‘lmagan taqdirida ham, Qarshi klubi tushib olgan tempini yo‘qotmadi. Legioner futbolchilar haqida gap ketganida esa Dragan Cheranni topgan agentga ham, uni ko‘ndirib, O‘zbekistonda olib qolganga ham rahmat aytish mumkin.
Turkiya yig‘inida bo‘lgan “Nasaf” so‘nggi o‘rtoqlik uchrashuvini 20-yanvar kuni Qozog‘istonning yetakchi jamoalaridan biri “Shaxtyor”ga qarshi o‘tkazadi.
“Nasaf” — “AEK” (Kipr) 1:0
Gol: Shahboz Erkinov, 55 (1:0).“Nasaf” — “Neftchi” (Ozarbayjon) 1:0
Gol: Farruh Sayfiyev, 67 (1:0).“Nasaf” — “Botoshani” (Ruminiya) 1:0
Gol: Dragan Cheran, 34 (1:0).“Nasaf” — “Sumgait” (Ozarbayjon) 1:0
Gol: Sharof Muhiddinov, 54 (1:0).“Nasaf” — “Karpati” (Ukraina) 3:1
Gollar: Dragan Cheran, 5 (1:0). Dragan Cheran, 50 (2:0). Gravets, 62-pen (2:1). Dilshod Xushbekov, 87 (3:1).20-yanvar, juma“Nasaf” — “Shaxtyor” (Qozog‘iston)
“Paxtakor”
Amirliklarga hammadan kechroq yetib borgan Toshkentning “Paxtakor” klubi o‘zining sobiq a’zosi Anzur Ismoilov to‘p suradigan “Chanchun Yatai” klubiga qarshi maydonga tushdi va 4:1 hisobida zafar quchdi.
Bellashuvda O‘zbekiston milliy terma jamoasi himoyachisi Anzur Ismoilov ishtirok etmadi. U Sankt-Peterburgning “Zenit” klubiga qarshi o‘yinda qatnashib, raqib darvozasiga kiritilgan birinchi golga mualliflik qilgandi.
Xitoy klubi darvozasiga Xitoy chempionatida qoyil qilib o‘ynab keta olmagan Sherzod Karimov 1 ta, Igor Sergeyev esa 2 ta gol urishga muvaffaq bo‘ldi. Yana 1 ta gol O‘zbekiston klublaridan o‘zgasida o‘ynab ulgurmagan Jaloliddin Masharipov hisobiga yozildi. Qayd etish kerak, yaqindagina “Paxtakor” Jamshid Iskanderovni so‘ragan Xitoy klublaridan biriga 5 million dollarlik chek ko‘rsatgani xabar qilingandi.
“Paxtakor” — “Chanchun Yatai” (Xitoy) 4:1
Gollar: Igor Sergeyev (2ta), Jaloliddin Masharipov, Sherzod Karimov.25-yanvar, chorshanba“Paxtakor” — “Krasnodar” (Rossiya)
27-yanvar, juma“Paxtakor” — “Jilina” (Slovakiya)
29-yanvar, yakshanba“Paxtakor” — raqib izlanmoqda…
Igor Shkvirin
“Olmaliq”dagi 9 yillik faoliyatidan keyin ishsiz qolgan mutaxassis Igor Shkvirin “Metallurg” klubida ish boshladi. “Championat.asia” sayti ma’lumotiga ko‘ra, Shkvirin seleksioner murabbiy bo‘lib ishlaydi.
Izoh (0)