Футбол бўйича Хитой терма жамоаси аъзоси Чжан Чендун «Бейжинг Гуоан»дан «Хебей Форчун»га 20,4 миллион евро эвазига кўчиб ўтди. «Championat.asia»нинг ёзишича, бу трансфер 27 ёшли Чендунни футбол тарихидаги энг қиммат хитойлик ўйинчига айлантирди.
Transfermarkt China маълумотларига кўра, Чжан Чендуннинг трансфер нархи 475 минг еврога тенг эди. Бироқ «Хебей Форчун» футболчи учун 43 баравар кўпроқ пул тўлашга рози бўлган.
Бу борадаги аввалги рекорд Сзин Янянга тегишли бўлиб, у ҳам ўтган мавсум «Гуанчжоу Фули»дан ўша вақтдаги рекорд нарх – 10,8 миллион евро эвазига «Хебей Форчун»га ўтган эди.
Футбол юлдузлари учун жаннатмакон ўлкага айланиб улгурган Хитойда «Хебей Форчун» довруқли легионерларга бой клублардан бири саналади.
Жамоага ўз вақтида «Реал Мадрид» ва «Манчестер Сити» бош мураббийи сифатида ишлаган чилилик мутахассис – Мануэль Пеллегрини устозлик қилади. Жамоа сафида эса Гаэл Какута, Эсекел Лавесси, Стефан Мбиа, Жервиню каби машҳур футболчилар бор.
Аввалроқ «Хебей Форчун» Лионель Мессига бир неча йиллик шартнома учун солиқлардан ташқари 100 миллион евро маош тўлашга тайёрлиги, колумбиялик ҳужумчи Хамес Родригес учун «Реал Мадрид»га 110 миллион евро тўлаши мумкинлиги ҳақида хабарлар пайдо бўлган эди.
Бироқ кейинроқ клуб раҳбарияти мазкур хабарларни расман рад этиб чиқиб, «миш-мишларни тўқиб чиқаришда клуб номидан фойдаланишни бас қилишни сўраган» эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)