Falastin davlati rahbari Mahmud Abbos AQShning saylangan prezidenti Donald Trampga murojaat qilib, Amerika diplomatik vakolatxonasini Quddusga ko‘chirishdan voz kechishni so‘radi, deb yozadi “TASS”. Falastin yetakchisi bu haqda respublikachining nomiga yuborilgan maktubda yozgan.
Matnda Abbos AQSh elchixonasini Quddusga ko‘chirishning xavfli ekanligi hamda ushbu qadam “ikki xalq uchun ikki davlat” tamoyili asosidagi tinchlik jarayoni uchun halokatli oqibatlarga olib kelishi tufayli Trampni bundan voz kechishga chaqirdi. U Sharqiy Quddusning istilochi Isroil hukumati tomonidan bosib olinishi xalqaro huquqqa zid ekanligini ta’kidladi.
Shuningdek, Abbos AQSh diplomatik missiyasining Quddusga ko‘chirilishiga to‘sqinlik qilishni so‘rab, Rossiya, Xitoy, Fransiya, Germaniya va Buyuk Britaniya yetakchilariga maktub yozdi.
O‘z saylovoldi kampaniyasi chog‘ida Tramp AQSh prezidentligiga saylangan taqdirda, Quddusning Isroil davlatining yagona va yaxlit poytaxti deb tan olinishiga erishishini aytgan edi.
Izoh (0)