AQSh razvedkasi mamlakatga uyushtirilgan xakerlik hujumlari Rossiya oliy rahbariyati ko‘rsatmasi bilangina amalga oshirilishi mumkin, deb hisoblaydi. AQSh milliy razvedkasi direktori Jeyms Klepper, mudofaa vazirining razvedka bo‘yicha o‘rinbosari Marsel Lettre va AQSh milliy xavfsizlik agentligi hamda kiberqo‘mondonlik rahbari Maykl Rojersning senatdagi eshituvlar chog‘i tarqatilgan qo‘shma bayonotida shunday da’vo qilinadi, deya xabar beradi “TASS”.
“Biz faqat Rossiyaning eng yuqori martabali rasmiy shaxslari AQShdagi saylovlar bilan bog‘liq ma’lumotlarni o‘g‘irlash va oshkor etishga ko‘rsatma bergan bo‘lishi mumkin, deb hisoblaymiz. Kiberhujumlar ko‘lami va unga duch kelgan obyektlar ahamiyatidan kelib chiqib, shunday qarorga keldik”, — deyiladi hujjatda.
Qayd etish joizki, AQSh razvedkasi oldinroq ham shunday xulosaga kelgan va bu haqda e’lon qilgandi. O‘z navbatida, Rossiya eng yuqori darajada bu kabi ayblovlarni rad etib kelmoqda.
Eslatib o‘tamiz, Yangi yil arafasida 35 nafar rus diplomati “Rossiyaning AQShdagi saylovlarga aralashuviga javob” sifatida Amerikadan chiqarib yuborilgandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)