Davlat bojxona qo‘mitasi tomonidan bojxona chegaralari orqali harakatlanadigan jismoniy shaxslar uchun 2013-yilda qo‘mita veb-sayti orqali yo‘lovchi bojxona deklaratsiyalarini to‘ldirish va chop etish xizmati joriy qilingandi. Bu haqda qo‘mita axborot xizmati xabar bermoqda.
Jismoniy shaxslar deklaratsiyani pdf shaklidan saytdan ko‘chirib olishlari, unga tegishli ma’lumotlarni elektron tarzda kiritishlari mumkin. Ma’lumotlarni kiritib bo‘lgach, deklaratsiyaning to‘g‘ri to‘ldirilganligini uning quyi qismida joylashgan “tekshirish” tugmasi orqali tekshirib ko‘rish imkoni mavjud. Agar xatolar aniqlansa, ularni tuzatgach, deklaratsiyani A5 formatdagi oddiy qog‘ozning mos ravishda old va orqa tomoniga 2 nusxada chop etib, bojxona postida taqdim etish yo‘lga qo‘yilgan.
Endilikda jismoniy shaxslar ushbu xizmatning yanada takomillashgan shaklidan Yagona interaktiv davlat xizmatlari portali orqali ham foydalanishlari mumkin. DBQ veb-saytidan farqli o‘laroq, portalda to‘ldirilgan yo‘lovchi bojxona deklaratsiyasini identifikatsion kod bilan birgalikda onlayn tartibda olish va A5 formatida qog‘ozga chop etib, bojxona postida taqdim etish mumkin.
Shuni yodda tutish kerakki, “Yo‘lovchi bojxona deklaratsiyasi”ni elektron taqdim etish, davlat interaktiv xizmatidan foydalanib, onlayn tarzda to‘ldirish uchun Internet Explorer brauzerini ishlatish yoki boshqa brauzerlardan foydalangan holda deklaratsiyani yuklab olib to‘ldirish uchun pdf shaklini o‘qiy oladigan dasturlar (masalan, Adobe Acrobat Reader DC, Adobe Acrobat Pro, Foxit Reader va boshqalar) o‘rnatilgan bo‘lishi lozim.
Mazkur xizmatdan foydalanish jismoniy shaxslarga yo‘lovchi bojxona deklaratsiyasini kompyuter yordamida o‘zlariga qulay bo‘lgan vaqtda va bojxona postidan tashqarida (ofis, ish joyi yoki uyda) to‘ldirish imkonini beradi. Natijada jismoniy shaxslar bojxona postlaridagi bayonnomalarni to‘ldirish ustunlarida navbat kutish, o‘zlari tanlagan tildagi blankalarni izlash kabi muammolarga duch kelmaydi hamda vaqti tejaladi.
Yo‘lovchi bojxona deklaratsiyasini elektron shaklda to‘ldirish vaqtida yo‘l qo‘yilgan xato va kamchiliklarni o‘sha vaqtning o‘zida tuzatish imkoniyati mavjud. Bojxona postlarida qog‘oz shaklida to‘ldirish jarayonida esa xatolikka yo‘l qo‘yilsa, yana yangidan to‘ldirishga to‘g‘ri kelishi mumkin.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)