Ispaniyaning “Valensiya” futbol klubini boshqarayotgan italiyalik mutaxassis Chezare Prandelli 3 oy deganda taqdirga tan berdi. Bu haqda “Chempionat” klub rasmiy saytiga asoslanib xabar berdi.
“Valensiya” rasmiy saytida qayd etilishicha, Prandellining o‘zi iste’fo so‘rab murojaat qilgan. Aslida uning shartnomasi 3 yilga mo‘ljallangandi.
“Jamoa turnir jadvalidagi muammolar bilan o‘ralashib yurgan bir vaqtda Chezare Prandelli kutilmaganda ariza yozdi. Murabbiy jamoani kuchaytira oladigan ahvolda emasligini qayd etdi. Qishki transfer davomida bir qator o‘zgarishlarga tayyorgarlik ko‘rayotgan vaqtimizda, uning iste’fosi qo‘qqisdan bo‘ldi”, — deb yozilgan klub bayonotida.
Vaholanki Prandellining 4 ta mag‘lubiyatini tushunsa bo‘lardi. Jamoa mavsumni yaxshi o‘tkazayotgan va sovrinli o‘rinlar uchun kurash olib borayotgan “Barselona”, “Sevilya”, “Real Sosyedad” kabi jamoalarga kichik hisoblarda imkoniyatni boy bergandi.
Ma’lumot uchun, Prandelli o‘z vaqtida Italiyaning “Atalanta”, “Verona”, “Parma”, “Roma”, “Fiorentina”, Turkiyaning “Galatasaroy” klublarida ishlagan, 2010/14-yillar davomida Italiya terma jamoasiga ustozlik qilgan. U Italiya terma jamoasini Yevro—2012 finaliga qadar olib chiqqan.
Avvalroq La Liga klublaridan “Malaga” ham bosh murabbiy iste’fosi bilan to‘qnash kelgandi.
Izoh (0)