Ўзбекистонда автомобилларни олиб қочганлик учун жавобгарлик кучайтирилди

Ўзбекистонда 27 декабрдан транспорт воситаларини олиб қочганлик учун жавобгарлик кучайтирилди, деб ёзади «Газета.uz». Жиноят кодексига киритиладиган тузатишларни Президент Шавкат Мирзиёев имзолади. Тузатишлар ҳақидаги қонун Олий Мажлис Қонунчилик палатаси томонидан 6 октябрда қабул қилинган ва Сенат томонидан 12 октябрда тасдиқланган эди.

Жиноят кодексининг янгиланган 267-моддасига мувофиқ, транспорт воситасини ўғирлаб кетиш энди 5 йилдан 10 йилгача озодликдан маҳрум этиш билан жазоланади (бунгача — 3 йилдан 5 йилгача озодликни чеклаш ёки озодликдан маҳрум этиш).

Худди шу жиноят а) такроран ёки хавфли рецидивист томонидан, б) шахслар гуруҳи томонидан олдиндан тил бириктириш орқали, в) зўравонлик билан ёки зўравонликни қўллаган ҳолда таҳдид билан ёки г) транспорт воситасини ўғрилик ёки босқинчилик йўли орқали ўғирлаш мақсадларида содир этилса, 10 йилдан 15 йилгача муддатга озодликдан маҳрум этиш билан жазоланади (бунгача биринчи иккита банд учун 5 йилдан 10 йилгача озодликдан маҳрум этиш кўзда тутилган эди).

Шунга ўхшаш хатти-ҳаракат а) ўта хавфли рецидивист томонидан, б) уюшган гуруҳ томонидан ёки в) транспорт воситасини босқинчилик ҳужуми йўли билан ўғирлаш мақсадларида амалга оширилса, 15 йилдан 20 йилгача озодликдан маҳрум этиш билан жазоланади (биринчи иккита банд учун 10 йилдан 15 йилгача озодликдан маҳрум этиш кўзда тутилган эди).