Ukrainadagi urush tashqi ko‘rinishidan Afg‘onistondagi 20 yillik mojaroga o‘xshamasligi mumkin. Biroq u AQSH prezidenti Donald Tramp uchun o‘xshash xavf va siyosiy javobgarlikni yuzaga keltirmoqda. Bu haqda Bloomberg xabar berdi.
Ma’lum qilinishicha, Tramp urushni tezda tugatishga va’da bergan, biroq bu vazifani bajarish qiyin bo‘lib bormoqda. Mojaro cho‘zilgan sayin AQSH prezidenti unga mas’ul bo‘lib qolishdan qo‘rqadi. Sababi ko‘pchilik uni Putinni to‘xtatish uchun yetarlicha harakat qilmaganlikda ayblashi mumkin.
Tramp olti oydan beri AQSH siyosatini boshqarmoqda, urush esa davom etmoqda. Endi bu uning mas’uliyatiga aylangan. Agar Putin uning davrida g‘alaba qozonsa, Tramp juda qattiq tanqidga uchrashi mumkin, deydi AQSHning Ukrainadagi sobiq elchisi, hozirda Atlantika kengashida ishlayotgan Jon Herbst.
Afg‘oniston bilan taqqoslash to‘liq mos kelmasligi mumkin. Sababi u yerda AQSH maksimum 100 ming askarga ega edi va 20 yillik urush davomida 2500 ga yaqin amerikalik harbiy halok bo‘lgandi. Oxir-oqibat, AQSH “Tolibon” faoliyatini to‘xtata olmadi. Tramp esa bunda hozirgacha sobiq prezident Jo Baydenni ayblab keladi.
Ukraina urushi esa to‘rtinchi yiliga kirgan. AQSH unda asosan harbiy yordam va qurol yetkazish orqali ishtirok etmoqda. Aksar tahlilchilarga ko‘ra, na Ukraina hukumati qulashi, na Rossiya butun mamlakatni bosib olishi ehtimoli mavjud. Shunga qaramay, Tramp o‘zining bu mojaro uchun javobgar emasligini ta’kidlashda davom etmoqda. NATO bosh kotibi Mark Ryutte bilan uchrashuvda u shunday degan edi:
Bu mening urushim emas — bu Baydenning urushi. Men sizlarni bu urushdan chiqarishga harakat qilyapman.
AQSH rahbariga qarshi bosim kuchaymoqda
Tramp qayta saylanishidan oldin Washington Post sharhlovchisi Mark Tissen unga murojaat qilib, shunday degan edi:
Agar siz Kobulning qulagani uchun Baydenni ayblamoqchi bo‘lsangiz, Kiyev qulashiga siz ham aybdor bo‘lib qolmasligingiz uchun harbiy yordam yuboring, degan u.
2024-yil fevral oyida Xalqaro munosabatlar kengashi prezidenti Maykl Froman ham Trampning urushni tez yakunlash istagini keskin tanqid qilgan. U bunday shoshilinch sulh “katta xato” bo‘lishini aytgandi.
Agar “Tolibon” Kobulda amerikalik Humvee harbiy mashinalarida yurishi yomon ko‘ringan bo‘lsa, Xarkov ko‘chalarida Rossiyaning Abrams tanklarida yurishini tasavvur qiling, degan u.
Froman shu tariqa Rossiya kuchlari g‘alaba qozonsa, AQSH yetkazib bergan zamonaviy harbiy texnikalarni qo‘lga kiritishi ehtimolidan ogohlantirgan.
Izoh (0)