AQSHlik senator Stiv Deyns 22-iyul kuni Senatda majlis o‘tkazdi. Unda davlat kotibining boshqaruv va resurslar bo‘yicha o‘rinbosari Maykl Rigas bilan suhbat olib borilib, Markaziy Osiyo tabiiy resurslarining ahamiyati va Vashingtonning Rossiya palladiysiga (metall) qaramligi muhokama qilindi.
Yig‘ilishda nutq so‘zlagan Deyns Markaziy Osiyo tabiiy resurslarining ahamiyatini ham ta’kidlab, hududdagi mamlakatlar bilan mustahkam aloqalar yo‘lga qo‘yilishi lozimligiga urg‘u bergan.
“Markaziy Osiyoga kelsak, hudud tabiiy resurslarga boy. Ammo atrofda Rossiya, Xitoy, Eron, Afg‘oniston davlatlari joylashgan. Shunga qaramay, Osiyo mamlakatlari iqtisodiyotni modernizatsiya qilish va Qo‘shma Shtatlar bilan munosabatlarni yaxshilash uchun jiddiy harakat qilmoqda. Men so‘nggi 14 oy ichida Markaziy Osiyoning 5 ta davlatida bo‘ldim. Ularning barchasi AQSH bilan hamkorlikni yo‘lga qo‘yish istagini bildirdi”, degan senator.
Shuningdek, majlisda AQSHning Rossiya palladiysiga qaramligini kamaytirish zarurligi ham ta’kidlangan.
“Palladiy — AQSH ishlab chiqarish sanoatida foydalaniladigan nihoyatda muhim metall. Jumladan, u o‘q-dorilar ishlab chiqarishda, ilg‘or elektronika va avtomobilsozlik sanoatida alohida ahamiyat kasb etadi. Dunyoda uni qazib oladigan 3 ta joy bor: Rossiya, Janubiy Afrika va Montana. Amerika ta’minot zanjirining zaifligini oshirish uchun ruslar bozorni palladiy bilan to‘ldirdi, narxlarni pasaytirdi. Oqibatda Stillwater konining 700 ga yaqin mehnatsevar xodimi ishdan bo‘shatildi.
Agar biz Rossiyaning narxlarni manipulyatsiya qilishini cheklamasak, Amerika ta’minot zanjirlari yanada zaifroq bo‘lib boraveradi. Bundan tashqari, Rossiya palladiysi ruslarga Ukraina urushini moliyalashtirishga yordam bermoqda”, degan Deyns.
Izoh (0)