Futbol bo‘yicha Italiya Superkubogida “Yuventus” va “Milan” klublari to‘qnash keldi. O‘tgan yilgi mavsumda Turin klubi “oltin dubl” qayd etgan bo‘lsa, chempionatni 7-o‘rinda yakunlagan “Milan” kubok finalida to‘p surib, Alvaro Morataning 110-daqiqada urgan goli evaziga 0:1 hisobida imkoniyatni boy bergandi.
Mamlakat Superkubogiga 2014-yilda bo‘lgani kabi Qatar mamlakati mezbonlik qildi. Dohaga birinchi tashrif “Yuventus” uchun omadsiz kelib, klub “Napoli”ga penaltilar seriyasida imkoniyatni boy bergandi. Oradan ikki yil o‘tib o‘sha holat takrorlandi, yagona farq raqibning “Milan” ekanidir.
Uchrashuvda hisob turinliklar tomonidan ochilib, milanliklar tomonidan tenglashtirildi. Penaltilar seriyasida esa Vinchenso Montella jamoasi omadliroq chiqdi. Har ikki klub darvozabonlari — Janluidji Buffon hamda Janluidji Donnarumma bittadan zarbani qaytarishga erishdi. “Yuve” safidan esa xorvatiyalik Mario Manjukichning zarbasidan keyin to‘p darvoza to‘siniga tegib qaytdi.
Mavsum boshida “Milan”ni qabul qilib olgan Vinchenso Montella uchun bu yangi klubi bilan birinchi katta muvaffaqiyat bo‘ldi.
Ma’lumot uchun, “Yuventus” Italiya Superkuboklarining so‘nggi beshtasida maydonga tushdi. Shularning 2 tasida “Napoli” va “Milan”ga imkoniyatni boy berdi. So‘nggi mag‘lubiyat “Yuventus” darvozaboni Janluidji Buffonning jamoadagi 600-o‘yiniga to‘g‘ri keldi.
“Yuventus”ning Superkubokdagi gegemonligi boshlanguniga qadar o‘tgan so‘nggi finalda ham “Milan” to‘p surgan bo‘lib, klub Xitoyda o‘tgan Milan derbisida hamshahri “Inter”ni taslim qilgandi.
Italiya Superkubogi Doha, Qatar 23-dekabr, juma