Футбол бўйича Италия Суперкубогида «Ювентус» ва «Милан» клублари тўқнаш келди. Ўтган йилги мавсумда Турин клуби «олтин дубл» қайд этган бўлса, чемпионатни 7-ўринда якунлаган «Милан» кубок финалида тўп суриб, Альваро Моратанинг 110-дақиқада урган голи эвазига 0:1 ҳисобида имкониятни бой берганди.
Мамлакат Суперкубогига 2014 йилда бўлгани каби Қатар мамлакати мезбонлик қилди. Доҳага биринчи ташриф «Ювентус» учун омадсиз келиб, клуб «Наполи»га пенальтилар сериясида имкониятни бой берганди. Орадан икки йил ўтиб ўша ҳолат такрорланди, ягона фарқ рақибнинг «Милан» эканидир.
Учрашувда ҳисоб туринликлар томонидан очилиб, миланликлар томонидан тенглаштирилди. Пенальтилар сериясида эса Винченцо Монтелла жамоаси омадлироқ чиқди. Ҳар икки клуб дарвозабонлари — Жанлуиджи Буффон ҳамда Жанлуиджи Доннарумма биттадан зарбани қайтаришга эришди. «Юве» сафидан эса хорватиялик Марио Манжукичнинг зарбасидан кейин тўп дарвоза тўсинига тегиб қайтди.
Мавсум бошида «Милан»ни қабул қилиб олган Винченцо Монтелла учун бу янги клуби билан биринчи катта муваффақият бўлди.
Маълумот учун, «Ювентус» Италия Суперкубокларининг сўнгги бештасида майдонга тушди. Шуларнинг 2 тасида «Наполи» ва «Милан»га имкониятни бой берди. Сўнгги мағлубият «Ювентус» дарвозабони Жанлуиджи Буффоннинг жамоадаги 600-ўйинига тўғри келди.
«Ювентус»нинг Суперкубокдаги гегемонлиги бошлангунига қадар ўтган сўнгги финалда ҳам «Милан» тўп сурган бўлиб, клуб Хитойда ўтган Милан дербисида ҳамшаҳри «Интер»ни таслим қилганди.
Италия Суперкубоги Доҳа, Қатар 23 декабрь, жума
Изоҳ (0)