Tailand aholisi qariyb ikki oy avval hayotdan ko‘z yumgan qirol Pumipon Adulyadet (Rama IX)ning 89 yoshini nishonlamoqda, deb yozadi “TASS”.
Tailandda qirolning tug‘ilgan kuni 1958-yildayoq milliy bayramga aylangan bo‘lib, ushbu sana mamlakat uchun alohida ahamiyatga ega. 1980-yildan 5-dekabr qirollikda Otalar kuni deb e’lon qilindi, ammo bu yil ushbu bayram birinchi marta Rama IX siz nishonlanmoqda, axir uni ko‘pchilik tailandliklar “Millat otasi — qirollar qiroli” deb ataydi.
Bayram munosabati bilan o‘n minglab odamlar sahardayoq Bangkokni Samutprakan provinsiyasi bilan birlashtiruvchi Pumipon Adulyadet nomidagi ko‘prikni to‘ldirdi. U yerda 999 nafar budda ruhoniysi marhum qirol haqiga duo o‘qidi. Shundan so‘ng ko‘prikda yig‘ilgan xalq birgalikda qirollik madhiyasini kuyladi.
Rama IX ning tug‘ilgan kuni munosabati bilan Bangkokda ko‘rgazmalar, shuningdek, jaz konsertlari bo‘lib o‘tmoqda — marhum qirol aynan ushbu musiqiy janr ishqibozi bo‘lgan.
Eslatib o‘tamiz, marhum Tailand qiroli Pxumipon Adulyadetning (Rama IX) yagona merosxo‘ri va valiahdi Maxa Vachiralongkorn 1-dekabr kuni Tailand hukmdori bo‘lish taklifini qabul qildi va taxtga chiqdi.
Izoh (0)