Michigan sudi shtatda AQShdagi prezidentlik saylovida berilgan ovozlarni qayta hisoblab chiqishni boshlashga ruxsat berdi
Michigan shtatining sharqiy okrug sudi AQShdagi prezidentlik saylovida berilgan ovozlarni qayta hisoblab chiqishni boshlashga ruxsat berdi. Sudya Mark Goldsmit 5-dekabr, dushanba kuni Toshkent vaqti bilan 11:00 da shunday qaror qabul qildi, deya xabar beradi “TASS”.
Sudya Michiganda ovozlarni qaytadan hisoblab chiqish bugun kunning ikkinchi yarmida boshlanishi mumkinligini bildirdi va shu tariqa shtat saylov komissiyasining bundan avval ikki kun tanaffus kerakligi, jarayonni chorshanba kuni ertalab boshlash zarurligi haqidagi dalilini rad etdi.
Sud qarori ovozlarni qayta hisoblashni 13-dekabrgacha tamomlash imkonini oshiradi. Aynan shu kungacha mazkur qayta hisoblash natijalari ustidan sudga shikoyat qilish mumkin.
O‘z navbatida, saylov natijalarini tekshirish tashabbusi bilan chiqayotgan “yashillar” partiyasidan AQSh prezidentligiga sobiq nomzod Jill Stayn sudga Pensilvaniyada ovozlarni qayta hisoblash bo‘yicha yangi da’vo bilan murojaat etishini ma’lum qildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
