Yaponiyada 20-iyul kuni parlament saylovlari bo‘lib o‘tdi. Unda hukmron Liberal demokratik partiya parlamentning yuqori palatasida ko‘plab o‘rinlarni yo‘qotgan bo‘lsa-da, bosh vazir Shigeru Ishiba iste’foga chiqmasligini ma’lum qildi. Bu haqda BBC xabar berdi.
Ovoz berish natijalari Ishiba hukumati taqdirini to‘g‘ridan-to‘g‘ri hal qilmaydi. Ammo bosh vazir oktyabr oyida parlamentning quyi palatasi nazoratini allaqachon yo‘qotgandi. Shu sababli endilikda Ishibaning hukumatiga bosim yanada kuchayishi taxmin qilinmoqda.
Saylov natijalari e’lon qilinganidan keyin so‘zga chiqqan bosh vazir e’tiborini endilikda AQSH bilan savdo muzokaralariga qaratishini bildirgan.
“AQSH bilan bo‘layotgan juda muhim savdo bo‘yicha muzokaralarni buzish xato bo‘ladi. Ayni paytda iqtisodiy inflyatsiya, narxlar oshishi va 1-avgustga belgilangan savdo bojlarini oldini olish zarur. Men lavozimimda qolaman va mavjud muammolarni hal qilish uchun bor kuchimni sarflayman. Qo‘shma Shtatlar prezidenti Donald Tramp bilan to‘g‘ridan-to‘g‘ri muloqot qilishni rejalashtirdim”, degan Ishiba.
2024-yil 27-oktyabrda ham Yaponiyada parlament saylovlari bo‘lib o‘tgan. Unda Liberal-demokratik partiya va uning ittifoqchisi Komeito partiyasi parlamentdagi ko‘pchilik ovozni boy bergandi. Xususan, LDP 191 ta o‘rinni, Komeito esa 24 ta o‘rinni egallagan. Bu ko‘rsatkichlar 2021-yilda mos ravishda 259 va 32 ta o‘rinni tashkil etgandi.
Izoh (0)