Mustaqil Davlatlar Hamdo‘stligi (MDH) kuzatuvchilar missiyasi vakillari O‘zbekiston Prezidenti saylovi mahalliy va xalqaro qonunchilik me’yorlari asosida, ochiq va demokratik ruhda kechganini ma’lum qildi. Bu haqda “Daryo” muxbiri xabar bermoqda.
“Bizning missiyamiz O‘zbekiston Prezidenti saylovi Respublika qonunlari va xalqaro me’yorlar asosida o‘tkazilganini ma’lum qiladi”, — deydi MDH kuzatuvchilari raisi Sergey Lebedev.
Missiya tomonidan milliy qonunchilik tizimi hamda normalarga zid keluvchi qoidabuzarliklar qayd etilmagani, yuzaga kelgan kichik holatlar bo‘yicha saylov uchastkalari va okruglarida o‘z vaqtida chora ko‘rilgani ta’kidlandi.
Kuzatuvchilar mazkur demokratik jarayon O‘zbekistonning keyingi taraqqiyot yo‘lidagi muhim qadam ekanligini, davlatda mavjud yangilanish jarayonlarida fuqarolarning mana shunday siyosiy faolligi , o‘z fuqarolik pozitsiyasini to‘la anglab yetgan holda saylovlarda ishtirok etishi jamiyatning barcha qatlamlarida huquqiy-siyosiy savodxonlik darajasini yuksaltirishda muhim rol o‘ynashini qo‘chimcha qildi.
Brifing davomida MDH missiyasining Belarus Respublikasidan tayinlangan vakili Lidiya Yermoshina 2000-yildan buyon O‘zbekistondagi siyosiy jarayonlar, qonunchilik bilan yaqindan tanish ekanligi, ammo bu yilgi saylov kampaniyasi hamda uning atrofida olib borilgan ishlar haqiqatan ham avvalgilariga nisbatan anchagina yangi, o‘ziga xos e’tirofga loyiqligini ma’lum qildi.
Izoh (0)