Gollandiyaning Flevoland provinsiyasi Biddingxeyzen qishlog‘idagi o‘rdak fermasida parranda grippi aniqlandi, deb yozadi “TASS” mamlakat iqtisodiyot vazirligiga tayanib.
“Virus tarqalishining oldini olish uchun u yerdagi qushlarning barchasi yo‘q qilindi, — deyiladi muassasa xabarida. — Shuningdek, ehtiyot choralari sifatida shu kompaniyaning Gelderland provinsiyasidagi Xirden va Ermelo aholi punktlaridagi xo‘jaliklarida ham barcha o‘rdaklar yo‘q qilindi. Bunda gap jami 180 mingga yaqin parranda haqida bormoqda”. Bundan tashqari, Biddingxeyzendagi virus bilan zararlangan xo‘jaliklardan 1 km masofada joylashgan fermadagi 10 mingga yaqin qush ham yo‘q qilingan.
Virus yuqqan fermadan 3 km radiusdagi kompaniyalar ustidan qat’iy nazorat o‘rnatildi. 10 km radiusdagi fermalarga o‘z hududidan parranda, tuxum, parranda go‘shti, axlat va poxol chiqarish taqiqlab qo‘yildi.
Parranda grippi Gollandiyada so‘nggi marta 2014-yilda avj olgan edi, o‘shanda kasallikni ancha tez bartaraf etishga muvaffaq bo‘lishgan. Eng keng ko‘lamli tarzda 2003-yilda avj olgan. Undan sanoatga yetgan bevosita zararning o‘zi 300 million dollarni tashkil qilgan.
Izoh (0)