Голландиянинг Флеволанд провинцияси Биддингхейзен қишлоғидаги ўрдак фермасида парранда гриппи аниқланди, деб ёзади «ТАСС» мамлакат иқтисодиёт вазирлигига таяниб.
«Вирус тарқалишининг олдини олиш учун у ердаги қушларнинг барчаси йўқ қилинди, — дейилади муассаса хабарида. — Шунингдек, эҳтиёт чоралари сифатида шу компаниянинг Гелдерланд провинциясидаги Хирден ва Эрмело аҳоли пунктларидаги хўжаликларида ҳам барча ўрдаклар йўқ қилинди. Бунда гап жами 180 мингга яқин парранда ҳақида бормоқда». Бундан ташқари, Биддингхейзендаги вирус билан зарарланган хўжаликлардан 1 км масофада жойлашган фермадаги 10 мингга яқин қуш ҳам йўқ қилинган.
Вирус юққан фермадан 3 км радиусдаги компаниялар устидан қатъий назорат ўрнатилди. 10 км радиусдаги фермаларга ўз ҳудудидан парранда, тухум, парранда гўшти, ахлат ва похол чиқариш тақиқлаб қўйилди.
Парранда гриппи Голландияда сўнгги марта 2014 йилда авж олган эди, ўшанда касалликни анча тез бартараф этишга муваффақ бўлишган. Энг кенг кўламли тарзда 2003 йилда авж олган. Ундан саноатга етган бевосита зарарнинг ўзи 300 миллион долларни ташкил қилган.
Изоҳ (0)