Yevroittifoqdan chiqishni istamagan britaniyaliklarga uning fuqaroligi uchun badal to‘lash taklif etilmoqda

Yevroparlament Buyuk Britaniya Yevroittifoqdan chiqishini yoqlamaganlar uning fuqaroligini sotib olishi mumkin bo‘lgan taklifni tayyorlamoqda. Bu haqda Belgiya sobiq bosh vaziri, Yevroparlamentdagi liberal va demokratlar fraksiyasi yetakchisi Gi Verxofstadt ma’lum qildi, deya xabar beradi “TASS”.

“Ko‘pchilik Yevroittifoq bilan aloqalarni uzishni istamasligi haqida gapirmoqda. Men Yevropa fuqarosi bo‘lgan va uni saqlab qolishga intilayotgan kishilar buni amalga oshirish imkoniga ega bo‘lishi kerakligi haqidagi g‘oyani ma’qullayman. Yevroparlament ushbu taklif uchun yil oxirigacha ovoz beradi, shundan so‘ng u ittifoqqa a’zo barcha davlatlar tomonidan qo‘llab-quvvatlanishi lozim”, — deya ta’kidladi Verxofstadt.

Taklifga ko‘ra, Yevroittifoq fuqaroligini saqlab qolishni istagan britaniyaliklar har yili ittifoq budjetiga badal to‘lashi kerak bo‘ladi. Buning evaziga ular Yevropada yashash va harakatlanish, shuningdek, saylovlarda ishtirok etish huquqiga ega bo‘ladi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.