Евроиттифоқдан чиқишни истамаган британияликларга унинг фуқаролиги учун бадал тўлаш таклиф этилмоқда

Европарламент Буюк Британия Евроиттифоқдан чиқишини ёқламаганлар унинг фуқаролигини сотиб олиши мумкин бўлган таклифни тайёрламоқда. Бу ҳақда Бельгия собиқ бош вазири, Европарламентдаги либерал ва демократлар фракцияси етакчиси Ги Верхофстадт маълум қилди, дея хабар беради «ТАСС».

«Кўпчилик Евроиттифоқ билан алоқаларни узишни истамаслиги ҳақида гапирмоқда. Мен Европа фуқароси бўлган ва уни сақлаб қолишга интилаётган кишилар буни амалга ошириш имконига эга бўлиши кераклиги ҳақидаги ғояни маъқуллайман. Европарламент ушбу таклиф учун йил охиригача овоз беради, шундан сўнг у иттифоққа аъзо барча давлатлар томонидан қўллаб-қувватланиши лозим», — дея таъкидлади Верхофстадт.

Таклифга кўра, Евроиттифоқ фуқаролигини сақлаб қолишни истаган британияликлар ҳар йили иттифоқ бюджетига бадал тўлаши керак бўлади. Бунинг эвазига улар Европада яшаш ва ҳаракатланиш, шунингдек, сайловларда иштирок этиш ҳуқуқига эга бўлади.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.