AQSh prezidentligiga “yashillar” partiyasidan nomzod Jill Stayn bir qator shtatlarda ovozlarni qayta hisoblab chiqish uchun 3 million dollardan ortiq mablag‘ to‘pladi. Bu haqda 25-noyabr, juma kuni Politico gazetasi ma’lum qildi, deb yozadi “Interfaks”.
Dastlab Stayn Viskonsin, Michigan va Pensilvaniya shtatlaridagi ovozlarni qayta hisoblab chiqish uchun 2,5 million dollar to‘plashni rejalashtirgan edi. Ushbu shtatlardagi g‘alaba respublikachi Donald Tramp uchun Oq uyga yo‘l ochgan edi.
Biroq endilikda Stayn shtabi saytida xayriya pullarining hisob-kitobi amalga oshirilayotgan maxsus tashkil etilgan jamg‘arma yangi maqsad — 4,5 million dollar to‘plashni oldiga qo‘ydi. Tashabbus mualliflarining ta’kidlashicha, ular ovozlar qayta hisoblab chiqilishiga kafolat bera olmaydi.
“Agar biz keragidan ortiq to‘plasak, qolgan mablag‘ saylov tizimi islohotini ilgari surish uchun sarflanadi”, — deyiladi saytga joylangan xabarda.
Prezidentlikka sobiq nomzod Hillari Klinton tarafdorlari Michigan, Viskonsin va Pensilvaniyadagi ovozlarni qo‘lda hisoblab chiqishga chaqirmoqda. Bunda Trampning bir qator okruglardagi g‘alabasi kompyuter tizimini buzib kirish natijasi ekanligi haqidagi ehtimolni istisno etish maqsadi ko‘zlanmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)