Toshkentdagi “Ko‘rgazma savdo markazi” majmuida kichik biznes va xususiy tadbirkorlik subyektlari mahsulotlarining xalqaro ko‘rgazmasi ochildi. Ko‘rgazma O‘zbekiston Respublikasi Savdo-sanoat palatasi, “Tadbirkor ayol” O‘zbekiston ishbilarmon ayollar uyushmasi va Expocontact mas’uliyati cheklangan jamiyati hamkorligida tashkil etildi. Bu haqda “Anons.uz” xabar bermoqda.
Ko‘rgazmada xorijlik tadbirkorlar, jumladan, Xitoyning 40 dan ziyod kompaniyasi o‘z mahsulotlari va xizmatlari bilan ishtirok etmoqda. Ular tomonidan kichik biznes subyektlari uchun uskuna va jihozlar, mebel, to‘qimachilik sanoati tovarlari, qurilish materiallari, elektr jihozlar va boshqa mahsulotlar taklif qilinmoqda. Yangi innovatsion ishlanmalar, resurs tejovchi minitexnologiyalar, quyosh panellari, telefonni quvvatlantiradigan qurilmalar tadbirkorlarda katta qiziqish uyg‘otmoqda.
Ko‘rgazmada Toshkent, Farg‘ona, Jizzax, Sirdaryo viloyatlaridagi asalarichilar hamda Toshkent, Samarqand, Buxoro va Xorazm viloyatlaridagi xalq ustalari tomonidan tayyorlangan hunarmandchilik buyumlari, tabiiy xomashyodan tayyorlangan mahsulotlar namoyish etilmoqda.
Mazkur tadbir yangi ish boshlayotgan tadbirkorlar uchun o‘z biznesini muvaffaqiyatli yo‘lga qo‘yish, tovarlar va kichik biznes xizmatlarini namoyish etish, zamonaviy tejamkor texnologiyalarni xarid qilish uchun qulay sharoit yaratmoqda, xaridor va ishlab chiqaruvchi o‘rtasida to‘g‘ridan-to‘g‘ri muloqot maydoniga aylandi.
Ko‘rgazma doirasida davra suhbatlari, turli kompaniyalar taqdimotlari, oilaviy biznesni rivojlantirishga bag‘ishlangan mahorat darslari o‘tkazilishi mo‘ljallangan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)