O‘zbekiston Respublikasi prezidentligiga O‘zXDPdan ko‘rsatilgan nomzod Hotamjon Ketmonov Xorazm viloyati saylovchilari bilan uchrashdi. Viloyat Ma’naviyat va ma’rifat markazi majlislar zalida bo‘lib o‘tgan uchrashuv bir vaqtning o‘zida viloyatning barcha tumanlaridagi saylovchilar bilan video-konferensiya shaklida tashkil etildi. Bu haqda “Daryo”ga partiya matbuot xizmati ma’lum qildi.
Tadbirni O‘zbekiston Respublikasi Oliy Majlisi Qonunchilik palatasi deputati Abdug‘affor Qirg‘izboyev ochdi va olib bordi. Nomzodning ishonchli vakili Raimbergan Saburov Hotamjon Ketmonovning tarjimai holi bilan yig‘ilganlarni tanishtirdi.
O‘zbekiston Respublikasi Prezidentligiga nomzod saylovoldi dasturining asosiy yo‘nalishlari yuzasidan yig‘ilganlarga batafsil ma’lumot berdi. Jumladan, kichik biznes, uy mehnati, kasanachilik va oilaviy tadbirkorlikni yanada rivojlantirish orqali xotin-qizlar bandligini ta’minlash samaradorligini oshirish, mehnat qonunchiligida ayollarga berilgan huquq va qo‘shimcha imtiyozlardan keng foydalanishlari uchun yanada maqbul sharoitlarni yaratish, mehnatga layoqatli aholini ish bilan ta’minlash zarurligini ta’kidladi.
Shuningdek, bir martalik vaqtincha ish bilan band shaxslar mehnat faoliyatining qonuniy asoslarini takomillashtirish, ularning pensiya ta’minoti va ijtimoiy sug‘urtasi bilan bog‘liq masalalarni hal qilishning me’yoriy-xuquqiy asoslarini ishlab chiqish va amaliyotga kiritish, turli imtiyozlar berish orqali ish beruvchi va xodim o‘rtasidagi norasmiy mehnat munosabatlarini qonunchilikka kiritish, mehnat muhofazasi qoidalarini buzganlik uchun tadbirkorlarning mas’uliyati va javobgarligini oshirish haqida to‘xtaldi.
Ma’ruza yuzasidan bir qator ishtirokchilar so‘zga chiqdi. Ular o‘z chiqishlarida nomzod dasturida ilgari surilayotgan kuchli ijtimoiy siyosatni amalga oshirishda davlatning tartibga soluvchanlik rolini mustahkamlash, yetakchi ijtimoiy sohalarning tijoratlashuvini cheklash, aholining ijtimoiy himoyaga muhtoj qatlami vakillariga imtiyozlar belgilash va qo‘llash tartibini ishlab chiqib, hayotga tatbiq etish, uning ijrosini jamoatchilik, deputatlik nazoratiga olish masalasini qo‘llab-quvvatladi.
Izoh (0)