Ўзбекистон Республикаси президентлигига ЎзХДПдан кўрсатилган номзод Ҳотамжон Кетмонов Тошкент шаҳри сайловчилари билан учрашди. «Туркистон» саройининг катта мажлислар залида бўлиб ўтган учрашув бир вақтнинг ўзида пойтахтнинг барча туманларидаги сайловчилар билан онлайн видео-конференция шаклида ташкил этилди. Бу ҳақда «Дарё»га партия матбуот хизмати маълум қилди.
Тадбирни Ўзбекистон Республикаси Олий Мажлиси Қонунчилик палатаси депутати Абдуғаффор Қирғизбоев очди ва олиб борди. Номзоднинг ишончли вакили Ҳайдар Бобохонов Ҳотамжон Кетмоновнинг таржимаи ҳоли билан йиғилганларни таништирди. Шундан сўнг сўз Ўзбекистон Республикаси Президентлигига номзодга берилди.
Ҳотамжон Кетмонов Тошкентнинг мамлакат иқтисодиётида тутган ўрнига алоҳида тўхталиб, ялпи ички маҳсулотнинг 17 фоизга яқини, саноат ишлаб чиқаришнинг 18 фоиздан ошиғи, инвестицияларнинг 18 фоизга яқини, савдо айланмасининг 21 фоиздан, хизматларнинг 30 фоиздан, ташқи савдо айланмасининг 37 фоиздан, экспортнинг 28 фоиздан ортиғи пойтахт ҳиссасига тўғри келишини таъкидлади.
Номзод шаҳар аҳолисининг сиёсий онги ва тафаккури, маданияти, мамлакатда амалга оширилаётган ислоҳотларга нисбатан дахлдорлик туйғуси ниҳоятда юксак эканлигини таъкидлаб, бу ҳуқуқий давлат ва очиқ фуқаролик жамиятини барпо этишнинг энг муҳим шарти ҳисобланиши, айниқса сайловлар жараёнида муҳим аҳамият касб этадиган асосий омил эканлигини айтиб ўтди.
Пойтахт аҳли учун муҳим бўлган масала — аҳолига коммунал хизматлар кўрсатиш тарифларининг давлат томонидан тартибга солинишини такомиллаштириш орқали коммунал хизматлар нархларини мақбуллаштириш, аҳоли бандлигини таъминлашнинг мутлақо янги ва замонавий усулларини жорий қилиш, иш ўринларини ташкил этиш дастурининг сўзсиз бажарилиши устидан парламент назоратини кучайтириш, барқарор иш ўринлари сони билан ўрта махсус ва олий таълим муассасаларининг битирувчиларини ишга жойлаштиришнинг ўзаро боғлиқлигини таъминлаш лозимлиги ҳақида тўхталди.
Шундан сўнг маъруза юзасидан бир қатор иштирокчилар сўзга чиқдилар. Улар ўз чиқишларида номзод дастурида илгари сурилаётган тижорат банкларининг инвестициявий лойиҳаларни молиялаштиришдаги иштирокини янада кенгайтириш, хўжалик юритувчи субъектларни кредитлаш тизимини соддалаштириш, макроиқтисодий вазиятдан келиб чиқиб, фоиз ставкаларини минимал даражада белгилаш, муаммоли қарзлар юзага келишига йўл қўймаслик, банк хизматлари сифатини яхшилаш орқали уларнинг инвестициявий фаоллигини кучайтириш, маҳсулот етказувчиларга ўзаро эркин рақобатлашишига имкон берадиган очиқ ва ошкора электрон савдолар йўналишини кенгайтириш орқали давлат харидларини амалга ошириш тизимини такомиллаштириш зарурлиги тўғрисидаги фикрларини қўллаб-қувватлади.
Шундан сўнг савол-жавобларга навбат берилди. Унда сайловчилар ўзларини қизиқтирган саволларга номзод ва унинг ишончли вакилларидан атрофлича жавоб олиш имконига эга бўлди.
Изоҳ (0)