Venesuela muxolifati hukumat bilan muzokaralar o‘tkazishga rozi bo‘ldi

Venesuela muxolifati hukumat bilan muzokaralar o‘tkazishga tayyor ekanligini tasdiqladi. Uchrashuv 30-oktabr, yakshanba kuni Nueva-Esparta shtati, Margarita orolida bo‘lib o‘tishi lozim. Bu haqda Demokratik birdamlik bloki ijrochi kotibi Xesus Torrealba ma’lum qildi, deya xabar beradi “TASS”.

“Biz yakshanba kuni saylov jarayoni mavzusini muhokama etish niyatidamiz. Bu prezident vakolatini muddatdan avval tugatish masalasidagi referendum yoki yalpi saylovlar bo‘lishi mumkin”, — deya ta’kidladi Torrealba.

26-oktabr, chorshanba kuni Venesuelada muxolifat va hukumat tarafdorlarining ommaviy namoyishlari bo‘lib o‘tdi. Mamlakat IIV ma’lumotlariga ko‘ra, muxolifatchilar mitingini tarqatib yuborish davomida bir politsiyachi halok bo‘ldi, ikki nafari jarohatlandi.

Nodavlat tashkilotlar o‘nlab miting ishtirokchilari jabrlangani, 140 nafardan ortig‘i esa qo‘lga olinganini ma’lum qildi.