2016-yil 26-oktabr, chorshanba kuni soat 11:30 atrofida Toshkent shahar Shayxontohur tumani Farobiy ko‘chasidagi qurilish ishlari olib borilayotgan 393b-sonli bino konstruksiyalarining to‘satdan qulashi oqibatida 3 kishi halok bo‘ldi, yana 2 kishi turli darajada tan jarohati olib, shifoxonaga yotqizildi. Bu haqda O‘zbekiston Respublikasi favqulodda vaziyatlar vazirligi ma’lum qildi.
Dastlabki ma’lumotlarga ko‘ra, favqulodda vaziyatning sodir bo‘lishiga qurilish-me’yor qoidalarining buzilishi sabab bo‘lgan.
“FVV qutqaruv bo‘linmalari tomonidan bino vayronalari ostidan 2 kishi qutqarib olingan va halok bo‘lganlarning jasadi olib chiqilgan. Qulash sodir bo‘lgan joyda FVV, IIV YOXB va Toshkent shahar hokimligining kuch va vositalari tomonidan vayronalarni tozalash ishlari olib borilmoqda. Favqulodda vaziyat o‘chog‘i Toshkent shahar IIBB kuch va vositalari tomonidan o‘rab olingan hamda olib borilayotgan ishlar xavfsizligi ta’minlangan”, – deyiladi xabarda.
Yuzaga kelgan holat yuzasidan Shayxontohur tumani IIB va Prokuraturasi tomonidan surishtiruv ishlari olib borilmoqda.
Izoh (0)