BMT tashkilotning Nyu-Yorkdagi bosh qarorgohi hududida namoyishga qo‘yilgan san’at asarlari va boshqa eksponatlar haqida birinchi interfaol ma’lumotnomani taqdim etdi. Bu haqda “TASS” xabar bermoqda.
iOS va Android operatsion tizimlarida ishlaydigan qurilmalar uchun mo‘ljallangan bepul mobil dasturni foydalanuvchilar Apple App Store va Google Play Store mobil dasturlar do‘konlaridan yuklab olishi mumkin.
BMT o‘zining 71 yilligini shu yo‘l bilan nishonladi — 1945-yil 24-oktabr kuni butunjahon tashkiloti Nizomi kuchga kirgan edi. Mazkur sana har yili Birlashgan Millatlar Tashkiloti kuni sifatida nishonlanadi.
Mobil dastur foydalanuvchilar e’tiboriga BMTning Manxettendagi tashrifchilar uchun ochiq hududlari, xususan, Bosh Assambleya binosi birinchi qavati, sayyohlik markazi va xiyobon hududi xaritalarini havola qiladi.
Xaritada ko‘rsatilgan hududda mavjud san’at asarlari va boshqa osori-atiqalar joylashgan nuqtalar ko‘rsatilgan bo‘lib, nuqta ustiga bosilsa, eksponatning qisqacha ta’rifi haqida ma’lumot chiqib keladi.
BMTning eksponatlar kolleksiyasi umumiy hisobda bir necha o‘nlab san’at asarlaridan iborat bo‘lib, ularning bir qismi bosh qarorgoh vestibyullariga, yana bir qismi esa xiyobonga o‘rnatilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)