Estoniyada o‘tkazilgan tadqiqotga ko‘ra, mamlakat qurolli kuchlari razvedka batalyoni harbiy xizmatchilarining yarmi alkogol ichimliklarni xavfli miqdorda ko‘p iste’mol qiladi. Bu haqda TJournal xabar bermoqda.
“Razvedka batalyoni harbiy xizmatchilari orasida alkogol iste’mol qilish jiddiy muammo hisoblanadi va ma’lum darajada harbiy qismning jangovar tayyorgarligiga ham ta’sir qiladi. Agar bunga e’tiborsizlik qilinsa, kelajakda jiddiy muammolarga sabab bo‘lishi mumkin”, — deb yozadi mahalliy Eesti Paevaleht gazetasi.
Elit batalyon shaxsiy tarkibi 327 nafar harbiy xizmatchidan iborat bo‘lib, ularning 161 nafari (49,3 foizi) alkogolni sog‘liqqa zarar yetkazadigan daraja ko‘p iste’mol qiladi.
Batalyondagi professional harbiylarni tez-tez xorijdagi missiyalarga yuborishadi va safar davomida ular yuqori darajada hissiy zo‘riqishga uchraydi.
Tadqiqot natijalariga ko‘ra, harbiylarning 36 nafari tushkunlik va uyqusizlikdan, 23 nafari ijtimoiy qo‘rquvdan, yana 22 nafari esa behalovatlikdan aziyat chekadi.
Estoniya Mudofaa kuchlari qo‘mondonligi yuzaga kelgan holatga qarshi kurash olib borishni rejalashtirmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)