Iroq hukumat kuchlari terrorchilar tomonidan egallab turilgan Mosul shahriga 8 kilometr masofagacha yaqinlashdi. Bu haqda “TASS” xabar bermoqda.
“Al-Mayadin” telekanali axborotiga ko‘ra, Iroq armiyasi shimoliy yo‘nalish bo‘yicha ishonch bilan olg‘a ildamlamoqda. Ayni vaqtda, shialarning “Al-Hashd ash-Sha’biy” ko‘ngillilar bo‘linmasi va kurdlarning “peshmerga” bo‘linmalari g‘arbiy frontda faol harakat qilmoqda.
Ikki yil avval IShID tomonidan egallab olinib, tashkilotning Iroqdagi poytaxti deb e’lon qilingan Mosulni ozod qilish bo‘yicha operatsiya 17-oktabr kuni tongda boshlangan edi. Shaharni ozod qilish bo‘yicha operatsiyaga jalb qilingan quruqlikdagi qo‘shinlarning umumiy soni 60 ming kishini tashkil etmoqda.
Unda, Iroq hukumat kuchlaridan tashqari, kurdlarning harbiylashtirilgan “peshmerga” bo‘linmalari, shialarning “Al-Hashd ash-Sha’biy” ko‘ngillilar bo‘linmasi, shuningdek, mahalliy sunniy aholidan tashkil topgan ko‘ngillilar guruhi ham qatnashmoqda.
Quruqlikdagi qo‘shinlarga AQSh boshliq xalqaro aksilterror koalitsiyasi va hukumat aviatsiyasi havodan, shuningdek, Iroq artilleriya kuchlari ko‘mak bermoqda. Razvedka ma’lumotlariga ko‘ra, hozir Mosulda 5 mingdan 6 ming nafargacha jangari bo‘lishi mumkin.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)