Rossiya mudofaa vazirligi olti harbiy Suriyada halok bo‘lgani haqidagi xabarlarni rad etdi

Rossiya mudofaa vazirligi bir qator OAVlar va chet el ijtimoiy tarmoqlarida Suriyada olti nafar rossiyalik harbiy xizmatchi halok bo‘lgani haqida paydo bo‘lgan xabarlarni rad etmoqda, deb yozadi “Interfaks”.

Muassasadagilar ta’kidlashicha, ayni paytda Suriyada bo‘lgan rossiyalik harbiylarning barchasi sog‘-omon va o‘zlariga tayinlangan topshiriqlarni bajarmoqda. Shunday ekan, olti kishining o‘limi haqida oldinroq paydo bo‘lgan ma’lumot, mudofaa vazirligi ta’kidlashicha, targ‘ibotdan boshqa narsa emas.

Nashr eslatishicha, avvalroq “Faylak ash-Shom” isyonchi guruhi olti nafar rossiyalik harbiy Suriyaning Xama provinsiyasida o‘ldirilganini ma’lum qilgan edi. Bu haqdagi xabar ekstremistlar faoliyatini kuzatib boruvchi SITE Intelligence group tomonidan e’lon qilindi, shuningdek, guruhning Twitter’ida ham paydo bo‘ldi.