16-oktabr kuni Amir Temurning 680 yilligiga bag‘ishlangan birinchi jahon yulduzlari xalqaro shaxmat turniri boshlanadi. Bu haqda, O‘zbekiston shaxmat federatsiyasiga asoslanib, “Gazeta.uz” xabar bermoqda.
Turnir 16–22-oktabr kunlari Toshkent va Samarqand shaharlarida bo‘lib o‘tadi. 50 ming dollar mukofot jamg‘armasiga ega musobaqada dunyoga mashhur shaxmat yulduzlari ishtirok etadi. 2013-yilgi tezkor shaxmat bo‘yicha jahon chempioni Shahriyor Mamedyorov (Ozarbayjon, 2791), 2009-yilgi Jahon kubogi g‘olibi Boris Gelfand (Isroil, 2753), 2002–2003-yilgi FIDE jahon chempioni Ruslan Ponomaryov (Ukraina, 2712) va shaxmat bo‘yicha 17-jahon chempioni Rustam Qosimjonov (O‘zbekiston, 2673) shular jumlasidandir.
Musobaqa doirasida mahorat darslari va bir paytda o‘tkaziladigan o‘yin seanslari tashkil etiladi. 15-oktabr kuni Toshkentdagi Respublika ixtisoslashtirilgan bolalar va o‘smirlar sport maktabida o‘zbekistonlik yosh iqtidor sohiblari uchun mahorat maktablari va shaxmat seanslari o‘tkaziladi. Seans ishtirokchilari — Toshkent shahri, Namangan, Andijon, Farg‘ona, Toshkent va Sirdaryo viloyatlaridagi saralash turnilarida g‘olib bo‘lgan to‘rt nafardan yosh shaxmatchi, shuningdek, Respublika ixtisoslashtirilgan bolalar va o‘smirlar sport maktabining olti o‘quvchisi.
17-oktabr kuni jahon yulduzlari va delegatsiya rahbari Bahodir Umrzoqov Samarqandga yo‘l olib, Olimpiya zaxiralari tayyorgarlik markazida Surxondaryo, Qashqadaryo, Navoiy, Jizzax, Xorazm, Buxoro, Samarqand, Qoraqalpog‘iston vakillari bo‘lmish yosh shaxmatchilar uchun mahorat darslari va shaxmat o‘yinlari seansini o‘tkazadi.
Izoh (0)