O‘zbekistonda falokatlarga qarshi kurashish salohiyatini kuchaytirish bo‘yicha dastur ishga tushirildi. Bu haqda UzDaily xabar bermoqda.
Mazkur dastur Jahon banki va O‘zbekiston hukumatining qo‘shma loyihasi hisoblanadi. Dastur tabiiy ofatlar xavfini kamaytirish va tiklanish bo‘yicha Global fond (GFDRR) huzuridagi rivojlanayotgan davlatlarda tabiiy ofat xavflarini boshqarishni keng tatbiq etish bo‘yicha Jahon banki va Yaponiya dasturi doirasida moliyalashtirilmoqda.
O‘zbekiston hukumatiga Jahon banki tomonidan dasturni amalga oshirishda texnik yordam ko‘rsatiladi. Ushbu loyiha yaqin 2,5 yil mobaynida O‘zbekistonning tabiiy ofatlar xavfini boshqarish sohasidagi imkoniyatlarini kuchaytirishga qaratilgan.
O‘zbekistonda barcha tabiiy ofatlar orasida zilzila eng ko‘p iqtisodiy yo‘qotishlarga olib keladi. Respublika aholisining hamda iqtisodiy obyektlarning yarmidan ko‘pi, jumladan, Toshkent shahri ham seysmik xavfli hududlarda joylashgan.
Jahon bankiga ko‘ra, O‘zbekistonda har yili kamida 1 million kishi zilziladan aziyat chekadi. Buning oqibatida mamlakat har yili yalpi ichki mahsulotning 3,2 foizi miqdorida zarar ko‘rmoqda.
Izoh (0)