Ўзбекистонда фалокатларга қарши курашиш салоҳиятини кучайтириш бўйича дастур ишга туширилди. Бу ҳақда UzDaily хабар бермоқда.
Мазкур дастур Жаҳон банки ва Ўзбекистон ҳукуматининг қўшма лойиҳаси ҳисобланади. Дастур табиий офатлар хавфини камайтириш ва тикланиш бўйича Глобал фонд (GFDRR) ҳузуридаги ривожланаётган давлатларда табиий офат хавфларини бошқаришни кенг татбиқ этиш бўйича Жаҳон банки ва Япония дастури доирасида молиялаштирилмоқда.
Ўзбекистон ҳукуматига Жаҳон банки томонидан дастурни амалга оширишда техник ёрдам кўрсатилади. Ушбу лойиҳа яқин 2,5 йил мобайнида Ўзбекистоннинг табиий офатлар хавфини бошқариш соҳасидаги имкониятларини кучайтиришга қаратилган.
Ўзбекистонда барча табиий офатлар орасида зилзила энг кўп иқтисодий йўқотишларга олиб келади. Республика аҳолисининг ҳамда иқтисодий объектларнинг ярмидан кўпи, жумладан, Тошкент шаҳри ҳам сейсмик хавфли ҳудудларда жойлашган.
Жаҳон банкига кўра, Ўзбекистонда ҳар йили камида 1 миллион киши зилзиладан азият чекади. Бунинг оқибатида мамлакат ҳар йили ялпи ички маҳсулотнинг 3,2 фоизи миқдорида зарар кўрмоқда.
Изоҳ (0)